NA ROG YATEEMI WALA RAB BEWATNA NU LAWE

شاعر: سجادؔ بخاری 

نہ روگ یتیمی والا رب بے وطناں نوں لاوے 

پردیس چہ زینبؑ وانگوں کوئی وسدا اجڑ نہ جاوے

تک پیؤدے اے لاشے نوں روندے نے حسنؑ حسینؑ اے
ہلیا وی عرش خدا دا جدوں زینبؑ کیتے وین اے
ہنڑ تیرے یتیماں نوں دس جا بابا چپ کونڑ کراوے

گل لا کے جنازے نوں ہائے اولادِ علیؑ فرمائے
تک نانا تیری امت نے کی اینج دے ظلم کمائے
بے آسرا کر کے سانوں پئی دنیا عید مناوے

ہنڑ رب دے حوالے زینبؑ تیرے بابے نوں ارما ن اے

تینوں چھڈ چلیاں میں کلیاں پر اے دستور جہان اے
تک لئی توں ویرن غازی نوں جے میری یاد ستاوے

ایس واسطے روواں زینبؑ میری نازک توں شہزادی
بوتی گرمی وچ صحراواں دے توں ٹرن دی کوئی نئی عادی
ہوسکتا امت نانے دی تینوں وچ بازار ٹراوے

ماں پیو دا پیار وی ہووے روے سر تے ہمیشہ سایہ 
سجادؔ دکھی زینبؑ آکھے سن عرضاں پاک خدایا
پردیس چہ ساڈے وانگوں نہ عید کسے نوں آوے